Kiel Instali Ĝavon en GNU/Linuksan Sistemon

Ĉi tiu paĝo klarigas kiel instali la Ĝavan Rultempan Medion (Java Runtime Environment) en GNU/Linuksan komputilon. Se vi volas ligi al ĉi tiu paĝo, bonvolu uzi la adreson http://purl.oclc.org/net/klivo/gxavolinukso

Unue, bonvolu kontroli la rimedojn de via sistemo. La bazaj bezonaĵoj estas Intel-bazita sistemo, kun minimume 64 megabajtoj da memoro, kaj proksimume 60 megabajtoj da libera diskospaco. Pli da detaloj troviĝas ĉi tie.

Sekve, necesas elŝuti la instal-programon de la interreto. Malfermu la hejmpaĝon, http://java.com/, kaj surklaku sur la granda blua butono Free Java Download.
La servilo sendos vin al elŝut-paĝo por Linukso, kiu prezentas elekton inter kvar instalprogramojn. Ĉi tiuj instrukcioj klarigas kiel elŝuti kaj instali la duan dosieron, Linux (self-extracting file).

Kiam vi surklakos la ligilon, via retumilo (foliumilo) petos vin konfirmi ke vi deziras elŝuti. Surklaku sur la butono kies teksto signifas 'Konservu sur disko'. Via sistemo eble demandos kie vi volas konservi la dosieron, aŭ eble simple metos ĝin en vian hejman dosierujon. Ni supozu ke la elŝutita dosiero nomiĝas jre‑6u12‑linux‑i586.bin, kaj ke ĝi nun troviĝas en via hejma dosierujo, /home/vianomo.


Post elŝutado, malfermu komand-linian interfacon ('komand-ŝelo', aŭ Terminal) por entajpi komandojn. Se ne estas lig-bildeto sur via labortabulo, kiel tiuj maldekstre, bonvolu aktivigi la komand-linian interfacon per menuo. En anglolingvaj sistemoj, la pado estas:

Applications > Accessories > Terminal

Necesas akiri privilegiojn por daŭrigi instaladon. En la Terminal-fenestro, tajpu la komandon:

su    (Kaj poste <enter>, kompreneble.)

Linukso petos ke vi entajpu la pasvorton por root. Post konfirmo de la pasvorto, entajpu la sekvajn komandojn:

mv jre‑6u12‑linux‑i586.bin /usr/java
(Por movi la instalprogramon al taŭga loko.)

cd /usr/java
(Por iri al la dosierujo kie la instalprogramo situas.)

chmod 700 jre‑6u12‑linux‑i586.bin
(Ŝanĝu modon. Ĉi tio donas permeson al la instalprogramo por kuri.)

./jre‑6u12‑linux‑i586.bin      (Por aktivigi la instalprogramon.)

Bv. rimarki: Linukso kaj Unikso distingas inter majuskloj kaj minuskloj. Entajpu komandojn precize kiel ili estas montritaj.

Kiam la instalilo komencas kuri, ĝi montras permesilon. Premante la reiro-klavon, iru al la fino de la teksto. Por akcepti la kondiĉojn, entajpu 'y' por jes.


La instalilo malpakos dosierojn.


Kiam la instalilo finos sian laboron, entajpu la komandon ls por listigi la dosierojn. Rimarku ke estas nova subdosierujo, nomata jre1.6.0_12

Vi povas forĵeti la instalilon, se vi deziras:

rm ‑f jre‑6u12‑linux‑i586.bin

Fine, necesas ĝustigi mediajn variablojn de via sistemo. En la dosierujo /etc, estas dosiero nomata profile. Redaktu ĝin, kaj aldonu la ĉi subajn du liniojn ĉe la fino:

JAVA_HOME=/usr/java/jre1.6.0_12; export JAVA_HOME;
PATH=$JAVA_HOME/bin:$PATH; export PATH;

(Denove, zorgu pri majuskleco.)

Por ke via sistemo 'vidu' la ŝanĝojn, necesas elsaluti kaj ensaluti denove. Post reensaluto, malfermu komandŝelon kaj entajpu:

java ‑version

Se via instalo sukcesis, la sistemo respondos:

java version "1.6.0_12"


Fino.